«А» дигән витамин бар,

«В» дигән витамин бар,

«С» дигән витамин бар,

«Д» дигән витамин бар.

Түп-түгәрәк, вак-ваклар,

Әйтерсең лә борчаклар,

Кайсылары ап-аклар;

Кайсылары ал гына!

Ә үзләре бал гына!

Иң уртасы

Әчкелтем,

Монысын белә ич һәркем–

Матур булса да тышы,

Эчендә файдалысы.

«А» хәрефләрен алып,

«В» хәрефләрен алып,

«С» хәрефләрен алып,

«Д» хәрефләрен алып, —

Күп хәрефләрне алып,

Һәммәсен тезеп сүзгә,

Шигырь яздым мин сезгә.

Шигырьләр бит, балалар,

Витамин кебек алар:

Күңелләрне үстерә,

Йөрәкләргә көч бирә.

Булса кайчак әчкелтем,

Монысын белә ич һәркем —

Хак сүз булмый төчкелтем!

Шәүкәт Галиев