Арифметик табышмаклар

Безнең гаилә

Без мактана алабыз:

Барысы биш малай без,

Барыбыз да бертуган,

Барыбыз да ир туган.

Безнең һәркайсыбызның

Сеңлесе дә бар әле.

Дәү әнине онытып

Торам икән, карале.

Әти белән әнине

Кушсак, ничәү булабыз?

Ник аптырап торасыз?

Ягез, тизрәк уйлагыз.

(Тугыз кеше)

Беләсеңме?

Йөз чикләвек җыйдым мин,

Биштән берен ашадым,

Калганының яртысын

Кортлы булгач ташладым.

Энем белән сенлемә

Бүлеп бирдем калганын.

Беләсеңме аларнын

Ничәшәрне алганын?

(Энесе белән сеңлесенә егермешәр чикләвек биргән)

Сәгать ничә?

Кушкан иде абыем

Миңа сәгать карарга,

Бары табышмак белән

Җавап бирдем аңарга.

Әйттем аңа тәүлекнең

Тик чиреге калганын.

Ә шуннан соң вакытны

Ничек белә алган ул?

Син дә моңа җавапны

Тиз табарсың, минемчә.

Тик шулай да әйт әле,

Сәгать ничә синеңчә?

(Кичке алты)