Тылсымлы сәфәр (Англия)

Тылсымлы сәфәр

Англия

Дон-дон-дон!

– Менә сиңа мә! 12 тулган икән инде! Нинди зур сәгать! Карале, Джимбо!

– Ну, кызлар! Син безнең кайда пәйда булуыбызга игътибар иттеңме соң?

Елмай үзенең Лондондагы Вестминстер сарае уртасында булуын һәм сәгатьле Биг-бен манарасына карап торуын аңламаган иде әле.

– Бу синең өеңме әллә? Син сарайда яшисеңме? – дип сорады кыз, аптыраган кыяфәттә Джимбога карап.

– Юк. Ләкин мин көзгенең бу юлы безне кая җибәргәнен аңладым бугай.

– Мин дә аңладым. Без Грейт-британның кэпиталы булган Лондонда бугай...

– Тагын акыл сата инде бу! Син Англия турында тагын нәрсә беләсең соң?..

– Күп нәрсә беләм мин. Монда Россиядәге кебек карлы бураннар булмаса да, хәйран салкын... Инглизләр бик кызык киенә: сандали белән тун кигән кызны күрү – гадәти хәл монда.

– Ә салкын тисә?

– Инглизләр вируслардан курыкмый, алар хәтта балаларына идәнгә төшкән ризыкны алырга да рөхсәт итә. Теләсә кайда: коридор идәненә, асфальтка һәм газон чирәменә утырып ял итү дә – еш очрый торган күренеш.

– Мин дә бераз инглиз булып алыйм әле, – дип, Джимбо, кулларын болгый-болгый, шундук чирәмгә чүгәләде. Куллары белән чак кына Елмайга тими калды һәм: Айм сорри, Елмай! – дип пышылдады.

– Син чын джентельмен икәнсең бит, Джимбо! Шулай да бу очракта «Екскьюз ми!» (Excuse me!) дип әйтүе дөресрәк булыр. Син миңа сукмыйча калдың бит.

– Каян гына белеп бетерәсең син боларның барысын да?!

– Безнең инглиз теле укытучыбыз бик әйбәт. Ул Англиядә укыган.

– Шәп! Ә монда тагын нәрсәләрне карап була? Әйтегез әле, мисс Елмай!

– Монда карар җирләр миллион! Әйдә иң элек Виндзор замогына барыйк. Ул, дөньядагы иң зур замок булганга, Гиннесның Рекордлар китабына да кертелгән. Аннары Гайд-паркны, күренекле Британ музеен карарбыз.

– Минем Елизаветта Икенче белән дә танышасым килә!

– Минем дә! Алайса, Букингем сараена да кереп чыгарбыз.

– Ә аннары өйгә кайтырбыз, яме?..

Салават Купере №12, 2019

Фото: pixabay.com