Балаларга песиләр турында шигырьләр

Песи, песи, пескәем,
Соры синең төскәең.
Йомшак синең йоннарың,
Җылы синең туннарың.

“Мияу, мияу!” – бар сүзең,
Ялкау да әле үзең,
Белмим инде, ни өчен
Бернигә китми исең?

Кызыксындырмый ни ау,
Кызыксындырмый ни уйнау.
Мияулау бөтен эшең,
“Мин сине мияу”, – дисең.

Нигә инде күз буяу –
Үзем дә сине “Мияу”!
Роберт Миңнуллин

Үзен бик чиста йөртә

Күрәсезме песине,
Юына, чистарына.
Ул кунакка барамы?
Ник юына, арына?

Йомшак тәпие белән
Битен әйбәтләп сөртә.
Ул шулай һәрвакытта
Үзен бик чиста йөртә.
Җәвад Тәрҗеманов

Сөенеч 

Сөенеч!
Сөенеч! –
Песиебез хәзер өч:
Зурысы – әни песи,
Икесе – бәби песи.
Бәбинең берсе ап-ак,
Ә берсе – кара колак.
Агына исем – Аппак,
Кара колакка – Шапшак.
Ренат Харис