Бармак уеннары

Баш бармагым — биюче,

Имән бармак — итекче.

Урта бармак — укытучы,

Атсыз бармак — аучы.

Чәнти бармак кем була?

Читек чигүче була.                                   

Фәрсия Зиннурова 

Баш бармагым туп була,

Имән бармак — бөтерчек.

Урта бармак була шакмак,

Атсыз бармак — сикергеч.

Чәнти бармак — барабан,

Сана, әйдә, яңадан. 

Бабай алды барабан,

Әби алды бөтерчек,

Әти алды машина,

Әни алды сикергеч,

Ә мин алам бер зур туп,

Уйныйм, тупны сикертеп.

Баш бармак була бүре,

Имән бармагым — төлке,

Урта бармагым — керпе,

Атсыз бармагым — аю,

Чәнти бармагым — куян,

Куянны кая куям?                               

Фәрсия Зиннурова

Бу бармак — кыяр,

Бусы — кәбестә,

Бу бармак — кишер,

Бусы — чөгендер,

Ә бусы суган булды —

Менә кәрзинем тулды.

Баш бармак бау ишә, 

Имән бармак имән кисә, 

Урта бармак ут кабыза, 

Атсыз бармак ат җигә, 

Чәнти бармак чәй эчә.