Бүген

Алсу җил таң нурларын 
Сибеп китте тәрәзгә. 
Урынымнан торалмый 
Яттым әле беразга. 
Нәрсәдер чаж-чож итә, 
Әй исләре, исләре! 
Искә төшерә өйдә 
Бәлеш пешкән кичләрне

Миңа карап елмая
Матур йөзле әбием.
Сөлгегә кулын сөртә
Ак яулыкны әнием:
 — Юын, чистарт тешеңне,
Матур итеп киен! — ди, —
Бүген татар бәйрәме —
Гает көне бүген! — ди.

Тордым, кердем кухняга. 
Камыр шулай, чыжылдап, 
Табага төшә икән, 
Кетер-кетер кетердәп, 
Йөгердем юынгычка.
Мин бәләкәй татарга
Ярамый мондый көнне
Озак йоклап ятарга.