Күңелле гимнастика

0-3 ай

Бала сәламәт булганда, 2 ай тулгач, аңа гимнастика ясата башларга мөмкин. Ләкин алдан табиб белән киңәшләшү яхшы. Күнегүләр санын һәм аның дәвамлылыгын табиб билгели. Гимнастика белән һәр көнне билгеле бер вакытта, ягъни ашатканнан соң 1 сәгать үткәч шөгыльләнергә киңәш ителә.

*Балага башта иң гади күнегүләр ясатыгыз, мәсәлән, кулларны як-якка җәю, күкрәктә чалыштырып кую, өскә күтәрү-төшерү. Тезләрне бөгү һ.б.

*Күнегүләр әкренләп катлауландырыла бара: баланы, кулыннан тотып, аркасыннан корсагына әйләндерү, корсагына яткан килеш башын күтәрү һ.б.

Гимнастиканы сак кына, бала белән ягымлы сөйләшә-сөйләшә ясатыгыз. Берәр җыр көйләсәгез яки музыка уйнатсагыз, бигрәк тә яхшы.

Гимнастиканың дәвамлылыгы баштарак 4-5 минут булып, соңрак 10-12 минутка җиткерелә, һәр күнегү 4-5 тапкыр кабатлана.

Игътибар!

*Гимнастика үткәрелә торган бүлмә яхшы җилләтелгән булырга, андагы температура 19-20 С тан ким булмаска тиеш.

*Күнегүләрне ясатыр алдыннан, кулларны яхшылап юыгыз, йөзек-балдакларны салып куегыз.

*Бала авырганда, физик күнегүләр ясатуны туктатып торырга кирәк.

Кафия Закирова