Татар халык авыз иҗаты

Әлли-бәлли итәр бу,
Йокыларга китәр бу,
Йокыларга киткәчтен,
Бик дәү булып үсәр бу

Салкын су, чиста су,
Баламның битләрен ю,
Баламның күзләрен ю.
Күзләре ялкынлансын,
Үзе нык, таза булсын.

Әттә, әттә, әттәти,
Минем улым бик тәти.
Минем улым бик тәти дә,
Йөреп китәр ул тәпи.

Биесен лә, биесен лә,
Биек тауга менсен лә.
Матур итек кисен лә,
Барысы моны сөйсен лә.

Үчтеки, үчтеки,
Үсмәгәнгә кечтеки.
Үсә-үсә зур булыр,
Бигрәк матур кыз булыр (кызларга).
Бик батыр егет булыр (малайларга).

Әлли-бәлли бәү итә,
Кызым йокыга китә.
Кызым йокыга киткәч,
Әнисе кайтып җитә.

Үсә-үсә бәбкәем,
Үсә-үсә зур була.
Кояш кебек сөйкемле,
Үзе сүзгә җор була.  

Минем кызым кечкенә,
Бик ошаган үземә.
Әкрен басып,
вак-вак атлап
Кил, алтыным, теземә.

Чәбәк-чәбәк әбкәсе,
Кая киткән әнкәсе?
– Каенлыкка җиләккә,
Кызыбызга бүләккә

Бу бармак – бабай,
Бу бармак – әби,
Бу бармак – әти,
Бу бармак – әни,
Бу бармак – бәби,
Аның исеме – Чәнти.