Р.Миңнуллин шигырьләре

Казан

Кремль, Казансу, Кабан...

Күкләргә ашкан Казан!

Төбәлгән карашыбыз

Гүзәл Казанга табан!

Авыр самавыр

Безнең самавыр — авыр,

Безнең самавыр — көмеш.

Суы беткән, ә үзе

Һаман да юан килеш!

Табын янында

Вил белән Нур ашаганда

Ашый ярышып.

Нигә алар бер-берсеннән

Торсын калышып!

Һәркайсының үз савыты

Һәм үз кашыгы.

Шулай булгач, ашыйлардыр

Нигә ашыгып?

Виле: «Бетә бит!» — дип, Нурны

Тора котыртып.

Нуры тиз-тиз ашый ашын,

Бетә дип куркып!

Тәмлетамаклар

Жираф ашый

Пирожный,

Морж ашый

Морожный.

Челән эчә

«Боржоми» —

Шундый су да

Бар, җаный!

Барбос

Ярата

Ирис,

Ә юлбарыс —

Барбарис.

Яратыр шул,

Яратыр —

Барбариста

Бал бар ич!

Какао һәм

«Кока-Кола»

Ярата, ди,

Коала.

Ә кабан

Ярата, ди,

Банан.

Антилопа

Ярата, ди,

Ананас.

Ул аннан да

Ананасрак

Ананасны

Табалмас!

Пудель —

Коктейль,

Бегемот —

Беренче сорт

Торт,

Ә кит —

Ит белән

Кәнфит.

Кашалот белән

Ат —

Салат

Һәм дә

Лимонад.

Маэмай

Ярата, ди,

Ак май.

Пони белән

Попугай

Помидор

Ярата

Бугай.

Ә мин бик тә

Канәгать,

Әгәр булса,

Җәмәгать,

Бәрәңге белән

Әйрән —

Миңа шулар да

Бәйрәм!

Аннары

Булмас

Артык

Эремчек белән

Катык.

Сез дә карагыз

Татып!