һөнәрләр турында шигырьләр

Доктор

Малайлар, юкка сез

Доктордан куркасыз.

Бик әйбәт ул, димен:

Әни бит ул минем.

Роберт  Миңнуллин

Кем кем була?

Илшат мөгаллим була,

Илдар зур галим була.

“Кибет ачам берүзем!” –

Диеп куйды Гөлйөзем.

“Бизнесмен!” – диде Марат,

Хәйләкәр генә карап.

Депутат була Таһир,

Ул күп сөйләргә маһир...

Үскәнен көтә-көтә,

Илгиз автобус “йөртә”.

Айгөл билет сатачак...

Йолдыз өйдә ятачак...

Ник эндәшми соң? Нигә?..

Озак уйлый бу Динә...

Менә ул телгә килде:

“Мин Динә булам!”- диде...

Ленар Шәех

Доктор апа

Ничек алай була икән

Доктор апаның кулы:

Эсселәсәң – салкынча күк,

Ә туңсаң – шундый җылы.

Ап-ак бүлмәгә керә ул,

Ап-ак халатын кия ул.

Чирең булса: “И, тәмле”, - дип,

Иң әче дару бирә ул.

Эчкәндә чырай сытыла,

Ә терелгәч көләсең.

“Тәмле” дигән сүзнең серен

Шулвакытта беләсең.

Газиз Нәбиуллин