«СалаваTik» яңа клип тәкъдим итә: «Алтын балык» җыры «су астында» яңгырый

Проект җитәкчесе Зилә Фәйзуллина билгеләп үтүенчә, Роберт Миңнуллин иҗаты «СалаваTik» репертуарында аерым урын алып тора. Шагыйрьнең «Әйлән-бәйлән», «Яратыгыз», «Әни кирәк» кебек җырлы видеолары инде күптән нәни тамашачыларның күңеленә кереп өлгергән.
«Шагыйрьнең бай мирасына яңадан мөрәҗәгать итеп, без аның иҗатын балаларга иң җылы, иң якын формада тапшырырга тырышабыз. «Алтын балык» — безнең балачак җыры, клибы да бик күңелле килеп чыкты. Ул балаларга һичшиксез ошар дип ышанабыз», — ди Зилә Фәйзуллина.
“Татарстанның халык шагыйре Роберт Миңнуллинның әдәби мирасын мәңгеләштерү һәм популярлаштыру максаты белән бүгенге көндә Роберт Миңнуллин исемендәге татар әдәбиятына һәм сәнгатенә ярдәм Фонды һәм  без - аның варислары эшчәнлек алып барабыз. Бу максатларны тормышка ашыруда Татарстан хөкүмәте дә, төрле эшмәкәрләр, фондлар, театрлар, мәктәпләр һәм башкалар һәрдаим ярдәм итеп торалар.  Күптән түгел "Бәхетле тарихлар" фонды ярдәме белән Г.Кариев исемендәге Казан дәүләт яшь тамашачы театрында Роберт Миңнуллинның тормышына һәм иҗатына багышланган "Гомер моңы" спектакле дөнья күрде. Мин һәркемгә бу спектакльне барып күрергә киңәш итәр идем. РМ шәхесе нигезендә дөньяга караш формалаштыру , күңелеңдәге яктылык һәм илһам чыганакларын эзләп табу турындагы бу спектакль һәркемгә хуш килер. Роберт Миңнуллинның әдәби мирасының әхлаки-тәрбияви көче бәһасыз, бу спектакль моңа тагын бер дәлил.

Тиздән Татарстан мәдәният министрлыгы тарафыннан игълан ителгән Роберт Миңнуллин исемендәге III балалар һәм яшүсмерләр өчен иң яхшы әдәби әсәр конкурсына нәтиҗәләр билгеле булачак. Бу конкурсның әһәмияте, әлбәттә, гаять зур: үсеп килүче буын өчен әдәби әхлаки-тәрбияви нигез салуның кирәклеге аерым ачык. Шулай ук каләм тирбәтүче яшьләр өчен бу конкурс язарга билгеле бер стимул булып торачак.
Роберт Миңнуллинның иҗади мирасын мәңгеләштерү йөзеннән бүгенге көндә тагын берничә проект әзерләнә. Киләсе ел башында Рәсәй күләмендә Роберт Миңнуллин исемендәге фәнни-гамәли конференция планлаштырыла, басмага берничә китап әзерләнә, һәм 2028 елда Роберт Миңнуллинның тууына 80 елга багышланган чараларга әзерлекне инде хәзердән үк башлап җибәрдек.” – ди  шагыйрьнең кызы Тансылу Робертовна. 
Бүгенге көндә «СалаваTik» проекты 90нан артык җырга видеоклип эшләгән. Салаватиклар тамашачыларны галәмгә дә алып китте, әкият иленә дә дәште, салават күперендә дә җырлады — бу юлы исә су асты дөньясына «дәште».
«СалаваTik» проектында яңа җырлар языла, клиплар әзерләнә. Ә декабрь аенда «СалаваTik»лар традицион Яңа ел концерты белән нәниләрне сөендерәчәк. Быелгы тамаша 15 һәм 17 декабрь көннәрендә Ленин исемендәге мәдәни-ял итү комплексында  узачак. 
“Әкияти спектакль быел әкият урманында  бара. Тамаша барышында урманда яшәүче геройлар үзләренең кемлеген оныта, хәтта Кыш бабай да Яңа ел якынлашуын искә төшерә алмый. Салаватикларны кызыклы маҗаралар, җырлы-биюле күренешләр һәм, әлбәттә, балалар студиясе укучыларының чыгышлары көтә. Әкияти образда килгән һәр балага бүләк тә булачак!» - ди оештыручылар.