Танышмак өчен табышмак

«Үти-үти!» — дип чакырсам,

Миңа кем килер —

«Кыйгак-кыйгак», — дип килерме,

Кем җавап бирер?

«Ти-ти-ти-ти!» — дип чакырсам,

Миңа кем килер —

«Бак-бак, бак-бак», — дип килерме,

Кем тавыш бирер?

«Дөгә-дөгә, дөгә!» — дисәм,

Миңа кем килер —

«Кыт-кыт, кытыйк», — дип килерме,

Кем җавап бирер?

«Маһ-маһ, маһ-маһ!» — дип чакырсам,

Миңа кем килер —

«Мияу-мияу», — дип килерме,

Кем тавыш бирер?

«Пес-пес, пес-пес!» — дип чакырсам,

Миңа кем килер —

«Һау-һау, һау-һау!» — дип килерме,

Кем җавап бирер?

Кайчан да кайчан барсы да

Дөп-дөрес килер,

Әнием шулчак аларга

Ашарга бирер:

Үрдәккә — ботка салыр,

Тавыкка — тары сибәр,

Казга — бәрәңге изәр,

Маэмайга — шулпа куяр,

Ә песигә — сөт кояр!

Шәүкәт Галиев