Кошлар турында шигырьләр

Тәрәзәне кем чиртә

(Р. Вәлиева)

— Тәрәзәне кем чиртә:

Чык-чык! Чык-чык!

— Мин килдем шулай иртә,

— Чыпчык, чыпчык.

Бик тә ашыйсым килә.

Чик-чик! Чик-чик!              

Йөгереп янына килдем,

Яраткан җимен бирдем.

— Үпкәләмә, дускаем,

Гафу ит, яме! — дидем.

Күнмиләр кошчыклар

(Э.Шәрифуллина)

Әй нәни кошчыклар,

Кечкенә чыпчыклар,

Ни салкын булып та,

Яшисез суыкта.

Дәү безнең өебез,

Әйдәгез,керегез.

Уйнарга яңадан

Бергәләп йөрербез.

Күнмиләр кошчыклар,

Әйтәләр:«Кермим,-дип,-

Бер җылы почмакка

Иркемне бирмим »,-дип.

Чыпчык

(Ф.Яруллин)

Тәрәз каршына

Килгән бер чыпчык.

Миңа кычкыра:

– Чык әле, – ди, – чык.

Алдый ул, беләм,

Гел шулай итә.

Йөгереп чыксам,

Оча да китә.

Фото: pixabay.com