Кышкы табышмаклар

Шома табанлы чана

Атсыз да алга чаба-

Җитез булса аяклар,

Кулда була таяклар.

Бар бер чана

Утырасы юк,

Бассаң-үзе чаба.

Нәрсә ул?  (Чаңгы)

***

Кышын тауда шуалар, җәен җыеп куялар. Нәрсә ул? (Чана)

***

Зең-зең килә,

Тимер тәкә тиң килә.

Берсен-берсе куа килә,

Тояклары шуа килә. (Тимераяк)

***

Ике агай тездән,

Калышмыйлар бездән. (Итек)

*** 

Колаклы ябалак кыштан саклый. (Бүрек)

***

Бер ягы – кыр, бер ягы урман. (Тун)

*** 

Биш агайга бер күлмәк. (Бияләй)

***

Бер агачта биш тармак,

Тармагы саен бармак. (Пирчәткә)

***

Йолдыз, йолдыз вак кына,

Яфраклары ак кына.

Өс киемеңә куна,

Тәнгә тисә су була (Кар бөртеге)

***

Оча – юк канатлары,

Чаба – юк аяклары,

Тышта булса өелә,

Өйгә керсә, җәелә. (Кар)

***

Җир өстендә ак мамык. (Кар)

***

Ак ашъяулык таптым,

Җир өстенә яптым. (Кар)

*** 

Элек үзе судан туды,

Хәзер үзе су тудыра. (Кар)

***

Ак мамык кебек,

Ялтырый алмаз кебек. (Кар)

Канатсыз, йонсыз нәрсә оча? (Кар)

***

 Мамык юрган, кат-кат сырган,

Үзе суп-суык. (Кар)

***

 Урамда батыр, өйдә елак. (Кар)

***

 Үзе су, үзе каты. (Боз)

***

 Утта янмый, суда батмый. (Боз)

***

 Ишегалдында таш була,

Өйгә керсә, су була. (Боз)

***

 Тышка куйдым – таш булды,

Өйгә керттем – су булды.

Инде нихәл итәрмен,

Утка куйдым – пар булды. (Боз)

***

Үкерә дә, котыра,

Бөтен җирне тутыра. (Буран)

***

Йон түшәгем ертылды,

Бөтен дөнья йон тулды. (Буран)

*** 

Каз мамыгын кагына,

Кагына да тузына. (Буран)

Фото:pixabay.com