Балачакта калыр идем

Балачакта калыр идем мәңгегә,

Чирәмнәрдән ялан тәпи йөрергә,

Курчакларны биләүләргә төрергә,

Калыр идем балачакта мәңгегә.

Көне буе төшмәс идем таулардан,

Чуерташлар чүпләр идем елгадан.

Кесә тутырып алма алып бакчадан,

Качар идем бәбкә саклаудан.

Шифалы ләйсән яңгырда чыланып,

Кояшның җылы нурына куанып,

Әниемнең кочагында назланып,

Йоклар идем төшләремә чуалып.

Балачакта калыр идем мәңгегә

Хыялымда бар дөньяны гизәргә

Зур үсәргә хыялланып йөрергә

Калыр идем балачакта мәңгегә!