Балалар өчен шигырьләр

Керпе белән Бала
— Керпе, Керпе, күр инде,
Энәләрең никадәр!
Уйнар идем синең белән,
Шундый булмасаң әгәр.
— Әй Бала, Бала, Бала,
Соң үзең уйлап кара:
Мин бит яшим урманда,
Кемнәр генә юк анда!

Туган җир
Сандугачкай, сайра, сайра,
Котлап язгы таңнарны.
Туган җирдәй гүзәл җирләр
Дөньяда тагын бармы?
Күрче, дөнья нинди матур,
Тирә-ягың гөл генә.
Гөлбакчадай ямьле була
Бары туган җир генә.

Сүз тыңлаучан булыгыз

Курчакларым, килегез, 
Яңа йортны күрегез. 
Менә бусы — ишеге, 
Рәхим итеп керегез!

Шаулашмагыз, елашмагыз,
Тату гына торыгыз.
Сез бит инде дәү курчаклар,
Сүз тыңлаучан булыгыз.

Яз
Яз килде, кояш көлде,
Дөньяга нур бөркелде.
Уянды бар агачлар,
Куанды алмагачлар.