Нәниләр өчен шигырьләр

Шәп рәсссам  
Төсле каләмнәрем кулда,
Бер фикер килде уйга. 
Җираф  ясап куйдым әле
Стенага – обойга.
Мин шәп рәссам буламмы?
Җавабын үзең уйла!

Мырауҗан
Песием бар – Мырауҗан,
Миңа охшаган – уңган.
Әби чорнаган йомгакны,
Тиз генә сүтеп куйган.

Кышкы күбәләк
Кар бөртекләре очалар,
Әйтерсең,  күбәләкләр.
Тәрәзәне ачкан идем,
Керде кар күбәләкләр.
Эределәр, калды бары,
Тамчылар, түгәрәкләр.

Тузганак
Кояш төсле сап-сары,
Чәчәк атты бакчабыз.
Иртәгесен ак мамыкка
Әверелде, баксагыз.

Сәгать
Тек-тек, текелдәп тора,
Туктаусыз йөргән була.
Сәгать  йөри,  дисәләр дә,
Гел  бер урында тора.