Якты ай, яхшы ай

Җир буйлап йөгерә 

Җылы ай, якты ай. 

Чәчәкләр сибә ул   

Бәйрәмле ямьле ай

Бизәлгән, киенгән 

Матурлык көннәре. 

Җиңүле, горур май — 

Батырлык көннәре. 

Мәйданга чакыра   

Зур Җиңү бәйрәме.  

Һәйкәлләр янында   

Чәчәкләр бәйләме. 

Байраклар, флаглар

Бәйрәмгә җыелган.

Бабайлар янына

Оныклар сыенган.

Бабайлар күзендә

Энҗе яшь калтырый,

Малайлар күзендә

Горурлык ялтырый.

Яңгырый сафларда

Җиңүгә дан җыры.

Өзелмәс дәвамлы

Буыннар чылбыры