Мәктәпкәчә яшьтәге балалар белән уйнау өчен бармак уеннары.

( 4 – 7 яшьлек балалар өчен)

Бу бармак – калфак – ки аны саклап

 бу бармак – камзул – читләре кызыл

 бу бармак – читек – тора биетеп,

 бу бармак – чүәк – әбидән бүләк

 бу бармак – түбәтәй, үзем кебек бәләкәй.

Бу бармагым  чәйнек булса – мин чәй кайнатыр идем

 бу бармагым  таба булса – кыздырып бәрәңге ашатыр идем,

 бу бармагым  пычак булса –ипине кисәр идем,

бу бармагым  кәстрүл булса – ашым да пешәр иде

 бу бармагым  чүмеч булса – аш салып  бирер идем

 әгәр кунакка чакырсаң үзем дә килер идем.

Бу бармагым – сыер бармак, димәк мөгезләре зур,

бу бармагым – сарык бармак, бөдрә йоннары матур,

бу бармагым кәҗә бармак, аның бар ак сакалы,

бу бармагым эт була – ул өйне саклап тора,

 бу бармагым – ат бармак – арада иң тырышы,,

 Йорт хайваннары бары  да – була кешенең дусты.

Бу бармак – тимер юл транспорты – трамвай, поезд, паровоз

бу бармак – коры җир транспорты – машина,

бу бармак –  һава транспорты – самолет,

 бу бармак – су транспорты – пароход.

 Бу бармак – тимер юл транспорты – поезд,

уф итәр, пуф итәр пошкырсада алып китәр.

Бу бармак –  гармун,

 бу бармак –  думбра,

 бу бармак – скрипка,

 бу бармак – быргы.

 Бу бармак була – курай

 Әйтәләр миңа кешеләр,

 “ Моңлы” диләр уйнавың,

 минем монда катнашым юк, үзе моңлы кураем.

Баш бармак – укытучы, ул күп нәрсәгә өйрәтә

Имән бармак – табиб, ул авыруларны дәвалый,

Урта бармак – төзүче, ул йортлар сала

Атсыз бармак – сатучы, ашамлыклар сата

Чәнти бармак кем була?

Ул эшен бик тә сөюче, ул буладыр тегүче.

Баш бармагым  –  кыш була, кар бураннары туза,

Имән бармак – яз килә, карлары эреп бетэ,

Урта бармак – җәй җитә, кызарып җиләк пешә,

Атсыз бармак – көз икән, сары яфраклар сипкән,

Чәнти бармак ни икән? Кыш үткән, яз җиткән,

Яз үткән, җәй җиткән, җәй үткән, көз җиткән,

Көз үткән, кыш җиткән – менә бер ел үткән.