Балам бар. Ионизаторлар, һава чистарту яки юу аппаратлары кирәкме?

«Салават күпере» журналының баш мөхәррире Зилә Язның балалар табибы, медицина фәннәре кандидаты, доцент Илдус Җәүдәт улы Лотфуллин белән әңгәмәсеннән өзек.

Бөтендөнья сәламәтлекне саклау оешмасы исемлеге буенча, кешенең сәламәтлегенә тәсир итә торган 10 факторның беренчесе – һава чисталыгы.
Бөтен мегаполисларда да һава бик пычрак. Газлар, тузаннар һавада җыела. Шуңа өйләребездә һава чиста булырга тиеш.
Струя булып өреп тора торган аппаратлар начар эшли. Алар зур кисәкле пар бүлеп чыгара, һаваны тиешле дәрәҗәдә дымландырмый, тирә яктагы әйберләрдә утырып кала.
Ионизаторлар – күбрәк мода. Аларның кирәкме, юкмы икәне өйрәнеп бетерелмәгән.
Һаваны юдыртучы аппаратларның файдасы исбатланган. Аларны халыкта «мойка воздуха» дип йөртәләр. Чиста су саласың да, тәгәрмәч әйләнә, су пар булып чыга, тузаннар, пычрак шунда җыела.
Бризерларның файдасы шулай ук исбат ителгән.