Үсәсем килә

5 сентябрь - шагыйрә һәм тәрҗемәче Фирая Зыятдинованың тууына 80 ел

Минем әни шундый әйбәт —

Мактап кына тора ул:

«Улым бигрәк уңган!» — диеп,

Миңа канат куя ул.

Әни мине мактаганда

Очып китәрдәй булам.

Бер талпынсам, йолдызга да

Менеп җитәрдәй булам!

«Эшчән кеше тиз үсә», — ди,

Белми әйтмәс әнием!

Үсәсем бар, — мин бит әле

Төпчек улы әнинең.

Кушканны да көтми эшлим —

Бик үсәсем килә ич!

Көн дә үсәм, әниемә

Зур-зур егет кирәк ич!