Дустым, син кунакка йөрергә, тәмле ашарга яратасың, шулай бит? Ә менә табын янында үзеңне дөрес итеп тота беләсеңме соң? Әйдә, этикет кагыйдәләрен искә төшерик! Ашар алдыннан кулларны яхшылап юарга кирәк. Ашаганда кашык, чәнечке һәм пычак куллан. Аш кашыгы белән аш, ә кечерәк десерт кашыгы белән ботка, пудинг, суфле, омлет аша. Ит һәм балык ризыкларын чәнечке һәм пычак ярдәмендә кисеп аша. Бу очракта пычакны уң, ә чәнечкене сул кулда тотарга кирәк. Ә менә макарон яисә спагетти, кәтлитне чәнечке белән генә ашыйлар. Ипине кул белән тотып, аннан кечкенә кисәкне сындырып алалар һәм авызга кабалар.
